Define your generation here. Generation What

يوميات قارئ صحف: الأربعاء 28 أكتوبر 2015

نبدأ جولتنا النهارده بالعناوين، اللي أغلبها كان بيرصد أول يوم في انتخابات الإعادة، ما عدا الأهرام اللي عنوانها الرئيس كان من وحي زيارة الرئيس للإمارت، واللي كل الجرايد غطتها طبعًا: توافق «مصرى ـ إماراتى» على الحل السياسى بسوريا، وجنبه عنوان عايم عن الانتخابات: يوم الحسم بجولة الإعادة، والأخبار كان عنوانها: تصويت خافت.. في انتخابات بلا طعم، والمصري اليوم: الإعادة صامتة، والوطن: مباراة «إعادة النواب» بلا جمهور، واليوم السابع: حضرت الصناديق.. وغاب الناخبون، وكمان كان في مانشيت كبير: الصدام القادم بين الرئيس ورجال الأعمال، وده عنوان مقال للصاعد بقوة لدندراوي الهواري.

وانفردت الأخبار بنشر مقال تلتين صفحة بعنوان “علشان بلدي” كتبه طارق عامر، المحافظ الجديد للبنك المركزي، مش هتفهم مناسبته ولا هدفه ولا مغزاه، هو بس بيقول إنه راجل مدير عظيم، زي أبوه، وعمه، ووالدته، وفاروق العقدة. غير كده حواديت بقى. بالمناسبة، التلت الباقي من الصفحة كاريكاتير ولا أبوخ من عمرو فهمي، بس مناسب جدًا للمقال.

وطبعًا الجرايد كلها أفردت صفحات لتغطية اليوم الأول من انتخابات الإعادة، وبصراحة شايف إن اللي ما اهتمش بالانتخابات نفسها مش هايهتم قوي بتغطيتها.. لكن لفت نظري فيهم: في الأهرام: الرشاوى الانتخابية تجتاح «مينا البصل واللبان» وسعر الصوت يصل لـ 600 جنيه، والأخبار: سماسرة الانتخابات بكرداسة يرفعون بورصة الصوت من 50 جنيها إلي مصاريف الدراسة، ولقطة لطيفة في الوطن: «لغة» بدو حلايب تربك القضاة.. «الكبار ما يعرفوش عربى»، والمصري اليوم كان فيها غلطة غلسة، صورة من طارق الفرماوي في لجنة في إسكندرية اتكررت في صفحتي 7 و9.

وفي الأهرام في تحقيق تحديات مجلس النواب فى مواجهة الحكومة والدستور سألوا فيه: الدكتور صلاح فوزي استاذ القانون الدستوري وعضو لجنة الخبراء العشرة لإعداد الدستور وعضو اللجنة العليا للإصلاح التشريعي- الدكتور شوقي السيد الفقيه الدستوري- الدكتور حسن أبو طالب مستشار مركز الأهرام للدراسات السياسية والاستراتيجية- الدكتور طارق فهمي أستاذ العلوم السياسية بجامعة القاهرة. ورغم إن كله كلام محترم وله وجاهته، لكن لما تقراه هتتلخبط جدًا من التضارب اللي في كلام الناس دول، وغالبًا هتقتنع إن البرلمان اللي جاي ده هيبقى فُرجة كبيرة قوي.. قوي.

وبمناسبة إسكندرية والانتخابات، في الأهرام: رئيس مجلس الوزراء: الاقبال على التصويت متروك للمواطن ودورنا تأمين الانتخابات ونزاهتها، وما فهمتش ليه تقرير تغطية لزيارة ميدانية لشريف إسماعيل يبقى ده عنوانه، والفقرتين المذكورين في العنوان يكونوا آخر فقرتين في التقرير!

والمصري اليوم نقلت تصريحات الراجل: “إسماعيل”: نعترف بالتقصير فى “أزمة الإسكندرية”، وهو العنوان اللي أغلب الجرايد نقلته بصيغ مختلفة، لكن البوابة قالت: رئيس الوزراء: حركة محافظين جديدة.. والحكومة بريئة من “كارثة الإسكندرية”!

واليوم السابع قالت: في أول استجابة لحملة “اليوم السابع” لتطهير المحليات أكبر حركة تغييرات في “محليات الإسكندرية، طبعًا الحكومة ما كانتش هتعمل حاجة لو اليوم السابع ما عملتش الحملة.. معروفة يعني.

والأهرام قالت: المفاجأة! «الرى» حذرت من غرق «الاسكندرية» منذ 6 شهور، وكمان تقرير فى تحقيقات النيابة العامة بالإسكندرية .. تشكيل لجان فنية لتحديد المسئولية الجنائية لتقديم المسئولين للمحاكمة، النيابة سمعت كل من “رئيس شركة الصرف الصحى ورئيس شركة الكهرباء ورئيس الهيئة العامة لنقل الركاب ورؤساء احياء وسط والجمرك والمنتزه … الذين القوا بالمسئولية على عدم الاستجابة الى مطالبهم من الوزارات بشأن تجديد واصلاح شبكة الصرف، وفجر رئيس هيئة الصرف  الصحى السابق يسرى هنرى مفاجأة فى التحقيقات بأن شبكة مياه الامطار ليست  منفصلة عن شبكة مياه الصرف الصحي”.

والأخير محمد البحراوي حاوره في المصري اليوم: اللواء يسرى هنرى رئيس «الصرف الصحى» بـ«الثغر»: غرق الإسكندرية «قدر».. و«المسيرى» برئ، وقال في الحوار: منذ أن توليت منصبى فى الشركة، فى سبتمبر ٢٠١٣، طلبت ٧٥ مليون جنيه نظير التخلص من مياه الأمطار، لأن هذه المهمة ليست من مهامنا، بل مهمة المحليات، ودورنا فقط هو التخلص الآمن من مياه الصرف الصحى وليس التخلص من مياه الأمطار فى الشوارع، ولم نحصل على هذه الأموال رغم مطالبنا المتكررة، ولم يستجب لنا أحد، وتاه الملف بين وزارة المالية والتخطيط، وعندما اجتمع بنا رئيس الوزراء، المهندس شريف إسماعيل، الأحد الماضى، (بعد الأزمة) فى الإسكندرية، طلبت منه المبلغ فوافق على الفور. لكن كمان كان في ضمن كلامه جملة لفتت نظري بصراحة: كنا نعرف أن هناك نوة قادمة، ولكن لم نكن نعرف حجمها لأن “دى حاجة بتاعة ربنا”. ونعم بالله يا سيادة اللوا.

وتحت الحوار ده على طول عزة مغازي عملت تقرير حلو، مسلسل «غرق الإسكندرية» بدأ بتجديد «الصرف الصحي»، أتمني كل الإسكندرانية اللي بيحلفوا بحياة سياتللوا عبسلام المحجوب يقروه.

وأخيرًا نقلت رسالة كتبها هاني المسيري على فيسبوك: المسيري: كنت أنوي الاستقالة بعد الانتخابات.. ولم أتعرض لمؤامرة.

وبالمناسبة بقى، قبل ما نسيب إسكندرية، لازم طبعًا نشير لموضوع غاية في الأهمية، خاصة إنه أكتر ما لفت نظر ناس كتير، وأكتر ما أزعجهم، وهو السخرية من المقدم مصطفى مختار (أو خاطر.. حسب الكاتب اللي انت بتتابعه).. بعد ما كل الجرايد عملت تقرير عنه إمبارح، النهارده في اليوم السابع أكرم القصاص كتب ملائكة «فيس بوك» وشياطينه و”فلاليطه” اللي عدى فيها على السيرة دي سريعًا، وقصاده على الجانب الآخر من الصفحة المقابلة محمد الدسوقي رشدي كتب أزمة الضابط  وخصص المقال كله للموضوع ده، ولام على الناس اللي سخروا من شكل جسم ظابط مرور بتاع أعمال إدارية.. وأنا مش متأكد هو ليه قرر إن المرور أعمال إدارية، ولما هو بتاع أعمال إدارية كان بيعمل إيه في الشارع؟.. لكن طبعًا التألق كان من نصيب حمدي رزق في المصري اليوم اللي كتب #الضابط#الجدع# مصطفى#مختار، وطبعًا لأن أستاذ حمدي بيحب المترادفات فحط علامات شباك كتير، في لحظة حداثة أو حماسة إنترنتية منه، ونتمنى حد يعرفه إن الهشتجة الكتير غلط.. لكن طبعًا لأنه ظابط، ولأن على رأي المثل (جحا أولى بلحم توره) البوابة انفردت بحوار عاطفى مع حظابط نفسه ضابط شتاء الإسكندرية يحاكم الجميع.

وآخر وأحلى حاجة بخصوص إسكندرية والانتخابات كانت في المصري اليوم، وهي كاريكاتير مخلوف وأنور.

في الأهرام وزير الموارد المائية أعلن تنفيذ 60% من سحارة «سرابيوم» أسفل القناة: واللي دورها “تمرير التصرفات المائية المطلوبة لاحتياجات مياه الرى والشرب لسيناء لخدمة 100 ألف فدان على ترعة سيناء الشرق فى نطاق شرق البحيرات وشرق السويس من خلال 4 خطوط مواسير ضخمة قطرها الخارجى 4 أمتار وتتم بطريقة الدفع النفقى بعمق 60 مترا من سطح الارض”، وكمان بمناسبة وزير الري، خبر الأهرام اللي موجود كمان في الأخبار وجرايد تانية: اجتماعات اللجنة الفنية لسد النهضة 7 نوفمبر بدون وزراء المياه، لكن البوابة قالت خبر: إثيوبيا تتجاهل مصر في “الوطنية لسد النهضة”، وقالت فيه إن الوزير الإثيوبي مش بيرد على جوابات نظيره المصري، ربنا يستر.. وبمناسبة ربنا يستر، في البوابة برضه خبر اتنشر من يومين في الأهرام لو أنا فاكر صح “الري: سد “كاروما” الأوغندي لا يؤثر على حصة مصر من المياه. أنا سمعت الكلام ده فين قبل كده؟

وقبل ما نبعد عن قناة السويس، في المصري اليوم: «قناة السويس»: تراجع الإيرادات بنسبة 4%.. و«مميش»: غير صحيح: أفاد التقرير الشهرى الصادر عن هيئة قناة السويس، ونشر بالموقع الرسمى للهيئة، تراجع إيرادات القناة بنسبة 4% خلال سبتمبر الماضى، مقارنة بنفس الفترة من العام الماضى، فيما نفى الفريق مهاب مميش، رئيس الهيئة، هذا الأمر، مؤكداً أنها حملة تشويه متعمدة ضد مشروعات القناة المستقبلية.. حضرتك يعني الهيئة بتشوه نفسها ولا إيه؟

وبالمناسبة دي، في الوطن على صفحتين: دراسة الدكتور ممدوح حمزة عن «تنمية منطقة السويس»، لو عندك وقت اقراها.

وكمان من المصري اليوم: زيارة «سرور» تفشل فى إنهاء إضراب «غزل المحلة»، ومن الوطن: عمال المحلة: «وزير القوى العاملة بيهددنا بالفصل عشان علاوة 50 جنيه».

لكن قبل ما تحزن على الوزرا كلهم، الأخبار جابت تقرير وزيرة الهجرة تطمئن علي المصريين المصابين في الأردن وتعود اليوم مع جثامين المتوفين، ورغم إن الوزيرة بتقوم بشغلها، لكن جميل إن يبقى عندنا وزير بيقوم بشغله وبيتحرك بسرعة.

و”البوابة تنشر أصناف السلع المعفاة من القيمة المضافة”، ودي مسودة مشروع القانون “غير نهائية”، والسلع المعفاة دي شملت المدارس الحكومية والخاصة وتجارة الكتب، في الصحة: المستشفيات والمستوصفات والتأمين الصحي وخدمات التأمين وإعادة التأمين وخدمة الإنترنت الأرضي لمدة عام بعد تطبيق القانون.وإعفاء تأجير الوحدات لأغراض السكن ومشروعات إنتاج وتوليد الكهرباء وإعفاء جميع منتجات الأسماك المصنعة ما عدا الكافيار وأسماك الرنجة المدخنة، وجميع منتجات المطاحن ما عدا الدقيق الفاخر أو “المخمر المستورد” والمحضرات المضنعة من اللحوم مثل البلوبيف واللانشون والبسطرمة والخضروات والفواكة والبقول المجهزة والمعبأة والخبز بجميع أنواعه ومنتجات المياه ماعدا المياه المعبأة ومنتجات الألبان بجميع أنواعها والعسل الأسود.

وعلى سيرة الأكل، معظم الجرايد نشرت خبر تحذير منظمة الصحة العالمية من اللحوم المصنعة باعتبارها مسببة للسرطان، زي السجاير، لكن اليوم السابع عملت ملف على صفحة كاملة بعنوان: سرطان قاتل.. الصحة العالمية تحذر من اللحوم المصنعة.. فأين وزارة الصحة المصرية؟

لكن الأهرام الوحيدة اللي قالت: أستراليا تصف إعلان «الصحة العالمية» بالعودة إلى حياة أهل الكهف، وزير الزراعة الأسترالي أكد أن الاستغناء عن مثل هذه الأطعمة في الحياة اليومية يعني العودة إلي حياة أهل الكهف. وأضاف جويس أنه إذا تم أخذ هذه النتائج علي محمل الجد فإن اللحوم الحمراء والمصنعة “تنضم إلي نحو 474 شيئا آخر تقول منظمة الصحة العالمية إنها مسببة للسرطان، بما في ذلك التنزه سيرا علي الأقدام في الخارج إذا كنت في المدينة أو تحت أشعة الشمس”.

وبمناسبة الوزراء الأجانب، في الأهرام خبر صغير: بوتين يختبر المسئولين الروس فى “الإملاء”.. تفتكروا ممكن نتعلم الموضوع ده من الروس.

وقبل ما نسيب روسيا، المصري اليوم قالت: مصر لم تطلب من روسيا تسليح “ميسترال”.

ولما تقروا في الأهرام خبر: الاتصالات: توصيل الإنترنت فائق السرعة للمدارس بالمناطق النائية، لازم قبل ما تفرحوا تقروا في الأخبار خبر: إصابة تلميذتين سقطت عليهما مروحة الفصل.. ودول كانوا في مدرسة نبيل الوقاد الابتدائية التابعة لإدارة النزهة التعليمية، اللي هي مش نائية خالص.

وبمناسبة التعليم، وربنا يستر على عيالنا جميعًا، الخبر ده من يومين على المواقع، لكن الأهرام نزلته النهارده، وممكن يكون مفيد للبعض: قنوات اتصال بين التعليم وأولياء الأمور.

والزميل نيوتن كتب في المصري اليوم مقال بدايته حلوة الصراحة: واجبنا وواجب الرئيس.

وبمناسبة سفرية الرئيس، المصري اليوم عملت ملف خاص لطيف عن الهند على صفحتين.

وفي الفن المصري اليوم نقلت الخبر اللي كل الجرايد قالته إن ست الكل هتنورنا، لكن كانوا هما الوحيدين اللي ركزوا على إنها جايبة الأمورة الصغيورة معاها: ميريل ستريب وابنتها فى افتتاح “مهرجان القاهرة”. وكمان من المصري: «ياني»: أرفض منع دخول الصحفيين المصريين لحفلاتي.. ربنا يكرمك يا عم. والخبر بيقول إن وزير السياحة “زعزوع تأخر ساعتين ثم طلب منه أن يكون سفيرًا سياحيًا لمصر”.. والراجل وافق الحمد لله.. ربنا يكرمك تاني يا عم.

وفي الرياضة طبعًا مفيش غير خناقة عمرو جمال ورمضان صبحي، وعظمة محمد صلاح، لكن في في الوطن حوار عجبني بصراحة رغم عدم محبتي للراجل تاريخيًا، سمير زاهر في حوار لـ”الوطن”: مجلس علام “رجالة أبوريدة” في الجبلاية وسقطاته كتير ولازم يرحل.

والأهرام اتكلمت عن تفاصيل 18 شهرا من المفاوضات لإنشاء استاد الأهلى الجديد من الخيال الإماراتى، وإنه نسخة من استاد ستاد هزاع بن زايد وهيتكلف مليار ونصف.

أخيرًا في الأهرام، مقال عمرو عبد السميع: رفعت السعيد.. أديبًا!، كتير ممكن هيستغربوه، لكن أنا مش أول مرة أسمع الكلام ده بصراحة.

وكمان لهواة قراءة المسافات الطويلة، ملف 8 موضوعات على صفحتين في الأهرام من عواصم العالم، ممكن لما تقراه تشوف صورة كاملة للمستجدات في الموضوع: سوريا إلى أين؟: خمسة عناصر تحدد الموقف المصرى من الملف السورى، تركيا أردوغان: سوريا موحدة ولا مكان للأسد!، السعودية ومصر .. تنسيق كامل للحفاظ على الأمن القومى العربى، جنيف 1 و2و3.. قطار الحل لم يصل إلى محطته المنشودة بعد!، الاتحاد الأوروبى يرفض التصعيد مع الدب الروسى، واشنطن.. هل تتقبل وجود الأسد لبعض الوقت؟، روسيا: نتمسك بإعلان جنيف.. ومصير الأسد يقرره الشعب السورى.

اعلان