يوميات قارئ صحف: 15 أغسطس 2015

استفتاح: أهلا بيكم لأول مرة في بيتنا الجديد في مدى مصر. بعضكم كان متابع اليوميات دي اللي بدأت كتابتها من حوالي 3 أسابيع على صفحتي على فيسبوك تحت هاشتاج #يوميات_قارئ_صحف. انتقالنا لمدى من أول النهارده مش هيغير حاجة بس هيقدم لك ميزتين ويقدم لي أنا ميزتين غيرهم. بالنسبة لك أولا لو كنت بتحب اليوميات فانت كده ضمنت إني مش هاكسل أو ازهق وأبطل أعملها بعد شوية، وثانيا هتقرا اليوميات بدري شوية لأني هاعملها الصبح ومش هأجلها لبعد الضهر أو بالليل بعد الشغل. وبالنسبة لي (أنا باشتغل صحفي في مدى من أواخر 2013 وممكن تشرفني بقراءة شغلي هنا) فأولا هاكتب لك اليوميات كل يوم في ساعات العمل الرسمية ومش هاضطر اشتغل عليها وقت إضافي بعد الشغل، وثانيا جالي زيادة في المرتب بسبب اليوميات مع خالص الشكر لرئيسة التحرير لينا عطا الله 🙂

فكرة اليوميات دي بدأت كبوست قصير باسجل فيه حاجات حلوة أو مهمة في الصحف الورقية اليومية (وأحيانا الأسبوعية) بتتوه ومش بتاخد حقها وسط طوفان الصحافة الرديئة والمتواطئة. بعد شوية اتطورت وطولت شوية وخدت شكلها الحالي اللي هو خلطة من انطباعات عامة عن جرايد اليوم وموضوع واحد بارشحهولك للقراءة وبعدين جولة في الجرايد فيها شوية أخبار وتقارير وتحقيقات أحبك تشوفها من باب العلم بالشئ أو أحبك تقراها عشان شايفها حلوة أو مهمة أو مفيدة أو أحب اقولك انا فهمت سياقها وخلفيتها ازاي أوايه اللي استنتجته من بين السطور. ساعات بارشح كمان مقالات رأي أو حوارات لكن ده بيبقى استثناء مش الأصل. وساعات بالفت نظرك لحاجة وحشة في رأيي وباقول ليه أنا شايفها وحشة. وباكتب لك بس عن الجرايد الورقية لأن سيادتك ممكن تلف على المواقع بنفسك من غير مساعدة. وباحاول على قد ما اقدر اضيف لك لينكات للمواضيع اللي باتكلم عنها. الفورمة دي هتفضل زي ما هي بدون تغيير إلا لو كتبت لي تعليقات واقتراحات علشان اطورها (بس مش هاكتب عن الرياضة).

أخيرا نقطة مهمة في الاستفتاح ده: ضروري تفضل تتعامل مع اليوميات دي على انها عمود رأي وبتمثل رأيي أنا بس. مفيش حد في مدى بيراجعها ولا بيدققها قبل النشر وهي على كل حال تمثل زي ما العنوان بيقول “يوميات قارئ صحف” ومش رأي الموقع. وطبعا اليوميات انتقائية ومقتصرة بس على الجرايد اللي باشوفها والحاجات اللي بتلفت نظري ومش جولة شاملة على كل المنشور في الصحافة. 

وأخيرا شكرا على تشجيعكم وتعليقاتكم وملاحظاتكم وتصويباتكم وترشيحاتكم اللي بعتوها في الأسابيع اللي فاتت ويا ريت تستمروا. عنواني hossambahgat1@gmail.com

———-

هنبدأ النهارده الجولة على طول بسبب المقدمة الطويلة. نبدأ مع الشروق: عدد وفيات الحر وصل 87 امبارح أغلبهم في القاهرة والشروق عملت تقرير اقتصادي حلو عن ارتفاع مبيعات “معدات مكافحة الحر” والتكلفة الاقتصادية على المستهلك لحاجات زي المراوح والتكييفات ومبردات المياه وطبعا الكهرباء. ودينا عزت كتبت تقرير عن مفاوضات بين الامارات والبنك الدولي لتقديم حزمة مساعدات مالية لدول الربيع العربي اللي تضررت في السنوات اللي فاتت مع التركيز على سوريا واليمن وليبيا والعراق وتصريحات دبلوماسية مجهلة عن خطط السعودية للحل السياسي في البلاد دي. المسجون اللي مات في قسم امبابة الداخلية بتقول انه مات بهبوط في الدورة الدموية معروفة لكن أمه بتقول انه مات من التعذيب. وفيه خبر “مقتلضابطشرطةعلىيدمسجلينخطربالقليوبية”. والنيابة العسكرية جددت حبس 4 متهمين في خلية “مخابرات الإخوان” المتهمة بالتجسس على الداخلية، الشئ المقلق في القضية دي ان من ضمن التهم الموجهة للمتهمين انهم استخدموا نظام التعمية أو التشفير لمنع التجسس على تصفحهم للإنترنت اللي هو المفروض حق طبيعي لكل مستخدم للأنترنت. الشروق نقلا عن مصدر أمني مجهول: “وتابعالمصدرأنالمتهميناستخدموا «vpn» وهو نظام سيرفر افتراضى يمكنك من الدخول بعيدا عن الرصد الامنى، حتى يمكنهم التواصل مع بعضهم البعض من خلال الانترنت ونقل البيانات بدون تعقب بأى طريقة، لأنه يساهم فى اخفاء التصفح عبر الانترنت، خلال عمليات اختراق المواقع الالكترونية الخاصة بالوزارات.” وبالمناسبة خبر اختراق موقع ماسبيرو امبارح، وضبط 31 من القيادات الوسطى للإخوان. وتصريح من ياسر برهامي: “السيسي بريء من قتل متظاهري رابعة.. وعلى الدولة دفع الدية الشرعية للأبرياء”. في الشروق كمان متابعة لقرار لجنة التحفظ على أموال الإخوان بخصوص صفوان ثابت وسبب رفض اللجنة التحفظ على شركة جهينة بتاعته. ومقال كتبه ناجح ابراهيم عن عصام دربالة اللي مات في السجن الاسبوع اللي فات وفيه تفاصيل شخصية جديدة وغير منشورة عن دربالة اللي طلع متجوز أخت زوجة ناجح. وتحت عنوان “ترزية التاريخ” كتب فهمي هويدي عن التغطية الصحفية المزرية امبارح لذكرى رابعة.

———-

في المصري اليوم النهارده تغطية مفصلة لليلة القبض على توفيق عكاشة امبارح في 3 أحكام تبديد وضرب وسب لطليقته. وتحقيق عن وضع زراعة الكتان في مصر، وتحقيق تاني عن احتفال المسلمين والاقباط بدخول العائلة المقدسة لمصر. وخبر عن قانون جديد الحكومة هتعمله للسماح للقطاع الخاص باستيراد الغاز وبيعه مباشرة للمستهلكين (الخطوة الجاية إنهاء صفقة استيراد مصر للغاز الإسرائيلي، والخبر كمان في الأهرام) وصدور التقرير الرسمي لهيئة الرقابة الدوائية اللي أثبت ان محلول معالجة الجفاف اللي قتل 7 أطفال على الأقل في بني سويف “غير مطابق للمواصفات”. و”التحقيق مع ٣ أطباء فى الغربية فى وفاة مريضين بعد رفض دخولهما العناية المركزة”. و”قرار وزارى مرتقب بمنع التمييز فى العمل ضد مرضى فيروس «سى»” نتمنى يشمل كمان فيروس بي.  و”«هاكرزإخوان» يخترقون موقع المطار.. ويضعون «شارة رابعة»”. وخبر عن استعداد أبو العلا ماضي لطرح مبادرة للصلح بين الدولة والإخوان. والمصري وكل الجرايد تقريبا ناشرين رد الخارجية المصرية الغاضب على تقرير سي ان ان قتل الرهينة الكرواتي وكونه مؤشر على تدهور الوضع الامني في مصر. تقرير سي ان ان هنا ونص بيان الخارجية هنا.

———-

التحرير النهارده كانت الجرنال الوحيد اللي نشر خبر مصادرة جريدة صوت الأمة الاسبوعية وفرم جميع النسخ امبارح عشان فيها تقرير عن مرض والدة السيسي (عدد صوت الأمة نزل النهارده السوق وبدل موضوع ام السيسي نشروا مكانه موضوع عن التغيير الوزاري المرتقب). وكمان هي الجرنال الوحيد اللي ربط بين القبض فجأة على توفيق عكاشة وبين هجوم عكاشة على وزير الداخلية قبلها بيوم: “وكان عكاشة قد طالب السيسي بإقالة عبد الغفار، مؤكدًا أنه سُحب الحراسة منه لكي يكون عُرضة للاغتيال من قِبل الجماعات الإرهابية، وقال، في أحد أحاديثه: «وزير داخلية إيه ده.. براحته هو حر يعمل اللي هوعايز يعمله.. تعالى لفقلي قضية، أنا بين يدي الشعب، وإذا كان الشعب بيحبني زي ما أنا بحبه يطلع يشوف الوضع دا إيه، دا في حالة لفقلي قضية، والله فوق الجميع».” 🙂 حلويات التحرير النهارده كتير: ملف عن وجود الإخوان في الفيوم على صفحتين، وصفحة عن عمارة المنايفة..الشاهد الصامت على فض اعتصام رابعة العدوية، وملف صفحتين عن وفيات الحرارة جوه السجون عنوانه “كيف الحر في الزنزانة؟” وبروفيلات لأبرز أعضاء اللجنة العليا للانتخابات اللي اتشكلت من يومين وتغطية مفصلة عن صفوان ثابت ومستقبل سهم جهينة بعد التحفظ على أمواله. كمان فيه خبر أن الأوقاف طلعت لياسر برهامي تصريح خطابة لمدة شهر واحد بس. وضباط مذبحة ترحيلات أبو زعبل مش عاجبهم تخفيف الحكم عليهم فهيطعنوا عليه عشان ياخدوا البراءة زي كل زمايلهم. وتغطية للقاء الصحفيين مع محلب امبارح بخصوص ملف الصحفيين المحبوسين. ورد من قاضي على حوار التحرير مع هشام جنينة بيدافع فيه عن الزند عنوانه: “المستشار محمد عبد المولى: الزند أسد القضاة.. وليس بحاجة إلى الدفاع عنه” وتأكيد من جيش الفتح لخبر مقتل أبو المغيرة المصري في سوريا اللي كانت البوابة انفردت بيه امبارح. وسيف الله الخوانكي كتب 10 أسباب لرفض قانون الخدمة المدنية. ومتابعة للأزمة داخل قناة CRT الفضائية وخبر سعيد ان احتمال معتز الدمرداش ميعملش الموسم التاني من “أخطر رجل في العالم”.

———-

خد بالك في اليوم السابع بداية التمهيد لرفع سعر تذكرة المترو في تصريحاتلرئيس الهيئة عن الخسائر بسبب السعر الحالي. وتقرير عن تصريح عاصم عبد الماجد لقناة إخوانية ان المعتصمين في رابعة كانوا بيراهنوا على انقسام في الجيش. وتقرير عن استعداد عدد من وزراء مبارك لنزول الانتخابات (مش عالموقع). وشركات الدواء المحلية بتحذر من سيطرة الشركات الأجنبية على 58% من القيمة السوقية لقطاع الدواء في مصر. وتقرير عن الدين المحلي عنوانه “قصة الـتريليون جنيه.. ديون الحكومة عند الحكومة“وتفاصيل عن مشروع المثلث الذهبي في الصعيد. وحوار مع رئيس أركان القوات المسلحة الليبية أغلبه عن قطر. وتغطية لمؤتمر اليوم السابع لدعم الصحافة الاقليمية.

———

مع إني مليش في الرياضة لكن طبعا سمعت عن الطفل اللي أبوه نزله يلعب في فريق الجونة من كم يوم. الوطن النهارده فيها تصريح ضحكني عن الموضوع ده في الصفحة الأولى على لسان أبو الطفل: “«الصحيفى الكبير»فى أزمة «طفل الجونة»: تعمدت إهانة «الجبلاية»”. في الوطن كمان تحقيق حلو: الحر برئ من انقطاع الكهرباء عن تدهور حالة المولدات والمحطات وتوقع الانقطاع من قبل ما يحصل رغم تصريحات وزير الكهرباء الوردية. وصفحة حلوة بمناسبة مرور 10 سنين على اتفاقية الكويز بين مصر وإسرائيل وأمريكا عنوانه “الكويز عشر سنوات من الحدل والتراجع والخسارة”. وانفراد بنشر “أحدث مسح لـ«العشوائيات»: 210 آلاف أسرة يسكنون 347 منطقة «غير آمنة»” وخبر مهم لكن بدون مصدر عن ان زيارة قيادات الجيش لسيناء امبارح جت عشان فيه معلومات عن عملية ارهابية كبيرة هتحصل في سيناء، ربنا يستر ملقيتهوش عالموقع. وفيها كمان تقرير ان وزارة العدل هتقبل “بعض” ملاحظات مجلس القضاء الأعلى على تعديلات قانون الإجراءات الجنائية لكن هترفض الباقي! وخبر انقلاب أوتوبيس سوهاج وموت 7 وإصابة 35. وانضمت الوطن بعد التحرير والمصري اليوم للصحف اللي زارت مستشفى الخانكة بتقرير عنوانه “مرضى في جحيم“. وخبر مخيف ان محمد فاضل هيعمل مسلسل عن قناة السويس الجديدة وطبعا تقدر تتوقع مين هتكون بطلته، لكن في المقابل خبر سعيد هو تأجيل فيلم نادية الجندي عن تهاني الجبالي إلى أجل غير مسمى.

———-

في البوابة انفراد بنشر نص قانون الملاحة الداخلية و”قانون الشباب الجديد: الحبس والغرامة عقوبة سوء الآداب في الملاعب”. وملف عن شبكة تهريب الأطفال المصريين لإيطاليا في قوارب الهجرة غير الشرعية.

———-

الأهرام فيها تقرير عن اعتداء ضابط شرطة في المرج على “عم فهيم” مع صورة للضحية متجبس. وتقرير عن الحرائق المتكررة في المصانع وموت العمال وسط غفلة المسئولين.

———-

الحياة السعودية نشرت تقرير حلو عن التغير في استراتيجية الهجمات الإرهابية في مصر بالتركيز على “الأهداف الرخوة” أرشحه للقراءة. وتغطية للمعارك العنيفة واستمرار سقوط الضحايا في مواجهات داعش ليبيا مع مسلحين في سرت. و”إيران تريد حواراً مع دول الخليج”. وظهور أول تأييد علني بل وتوجيه كمان من المرجعية الشيعية في العراق (السيستاني) للمظاهرات المعارضة للحكومة والمطالبة بالإصلاحات وده تطور مهم وإيجابي. عن العراق كمان فيه مقال طويل للكاتب العراقي نبيل ياسين بيشرح طبيعة التحدي وصعوبة الإصلاحات الجديدة: “هل يخرج العراق من غرفة الإنعاش؟” و”واشنطن تتبرأ من تصريحات الجنرال أوديرنو عن تقسيم العراق وتعتبرها رأياً شخصياً”. في الملف السوري: “واشنطن تطلق حملة في مجلس الأمن لوقف «البراميل»” المفخخة. والمفوض الأوروبي لشئون الهجرة صرح أن العالم بيشهد حاليا “أسوأ أزمة لاجئين منذ الحرب العالمية الثانية”. و”البرلمان اليوناني يقر خطة الإنقاذ الثالثة” امبارح.

———-

في الشرق الأوسط السعودية تقرير مهم من تل أبيب عن الخبر اللي اتنشر امبارح وقلت لك عليه: “إسرائيل تتوقع عائدات بمليارات من استخراج الغاز من البحر المتوسط..تقول إنها ستعطي أولوية بيعه «لجيرانها».. ولبنان يصر على عدم شرعيته”. وتصعيد من الخليج في مواجهة إيران بتقريرن عن القبض على خليتين متهمين بعلاقات بإيران وحزب الله اللبناني والإيراني واحدة في الكويت والتانية في البحرين. وتغطية لاستخدام داعش غاز الخردل المحرم دوليا في هجومها على قوات الأكراد. وتقرير عن اليونان من بروكسل “مصير اتفاق أثينا مع الأطراف الدائنة تحدده برلين” وتقرير تاني من أثينا: “وزراء مالية مجموعة اليورو يناقشون اليوم الاتفاق مع اليونان.. أثينا تشرع عملية خصخصة الموانئ والمطارات”. وترجمة تقرير مهم من نيويورك تايمز عن الاقتصاد الصيني (العالم حابس أنفاسه عشان الصين خفضت عملتها 3 مرات في 3 أيام) والأصل الانجليزي هنا. وشرح: “لماذا خفضت الصين عملتها 3 مرات خلال 72 ساعة؟” وخط جرينتش مطلعش في مكانه التاريخي والعلماء حركوه 100 متر. وعالم مصريات بريطاني بيقول ان نفرتيتي “دفنت سرًا داخل مقبرة ابنها توت عنخ آمون” وأستاذة آثار مصرية بتقول مش مؤكد.

———-

طولت عليكم فهاسيبكم مع خبر وأغنية. الخبر من الحياة عن قضية رفعها ورثة بليغ حمدي على نجم الراب الامريكي جاي زي Jay Z في محكمة في لوس أنجليس بتهمة سرقة لحن خسارة خسارة من بليغ واستخدامه كخلفية ناي لأغنية Big Pimpin’ أو التعريص لامؤاخذة الكبير. اسمعوها هنا

اعلان